روپے کی قدر میں مزید کمی ہونی چاہیئے،آئی ایم ایف

آئی ایم ایف نے خبردار کرتے ہوئے کہا ہے کہ پاکستان کو مشکل معاشي صورت حال کا سامنا ہے،پاکستان میں معيشت کي ترقي مزيد کم جب کہ مہنگائي بڑھے گي۔ دوسری جانب آئی ایم ایف حکام نے حکومت کے پاليسي اقدامات درست ليکن ناکافي قرار دیدیئے۔

عالمی مالياتي فنڈ (آئي ايم ايف) نے پاکستان کا دورہ مکمل کرنے کے بعد اعلامیہ جاری کردیا۔ آئی ایم ایف نے پاکستان ميں گيس اور بجلي کي قيمتوں ميں اضافے کي حمايت کردي، جب کہ حکام کا کہنا تھا کہ روپے کی قدر میں 18 فیصد کمی بھی درست قدم ہے، جب کہ روپے کی قدر اب بھی حقیقت سے زیادہ ہے۔

آئی ایم ایف کی جانب سے نئی فرمائیشوں کی فہرست پاکستان کا دورہ مکمل کرنے کے بعد اعلامیہ کی صورت میں جاری کی گئی۔

آئي ايم ايف نے اسٹیٹ بينک کی خود مختاری اینٹی منی لانڈرنگ قوانین کو مزید مستحکم بنانے، مالیاتی پالیسی مزید سخت کرنے اور شرح منافع بڑھانے پر بھی زور ديا ہے۔

آئی ایم ایف حکام کے مطابق پاکستان کو بلند مالياتي اور کرنٹ اکاؤنٹ خسارے کا سامنا ہے، جب کہ تيل کي عالمي قيمتوں ميں اضافے سے مشکل معاشي صورت حال پيدا ہوئي ہے۔ آئي ايم ايف نے خبردار کرتے ہوئے کہا کہ پاکستان کے زرمبادلہ زخائر گر رہے ہيں۔ معاشی ترقی کی رفتار میں کمی سے مہنگائی بڑھے گی، جس کیلئے حکومت کو فیصلہ کن ایکشن لينا ہوگا۔

آئی ایم ایف اعلامیہ کے مطابق معاشي مشکلات سے نکلنے کيلئے بیرونی فنانسنگ کی ضرورت ہے۔ سرکاري اداروں کے نقصانات کو کم کرنے کيلئے ٹيکس اصلاحات اور آمدن بڑھانے ہوں گے۔