دھونی نے نیا اعزاز اپنے نام کرلیا

بھارت کرکٹ ٹیم کے کپتان دھونی 200 میچز میں ٹیم کی قیادت کرنے والے پہلے بھارتی کپتان بن گئے ہیں۔

خبر رساں ادارے کے مطابق وکٹ کیپر اور مایہ ناز بلے باز بھارتی کرکٹ ٹیم کے سابق کپتان مہندرا سنگھ دھونی نے ایشیا کپ میں افغانستان کے خلاف میچ میں بھارتی ٹیم کی قیادت کی، جس کے بعد وہ 200 میچز میں ٹیم کی کپتانی کرنے والے پہلے کپتان بن گئے ہیں۔ یہ دھونی کا کپتان کی حیثیت سے 200 واں میچ تھا۔

بھارتی ٹیم پہلے ہی ایشیا کپ کے فائنل میں جگہ بنا چکی ہے، جب کہ ٹیم کے سلیکٹرز نے افغانستان کے خلاف سپرفور مرحلے کے پانچویں میچ میں کپتان روہیت شرما کو آرام دینے کا فیصلہ کیا تھا،اُن کی جگہ دھونی نے ٹیم کی قیادت کے فرائض انجام دیئے۔

ایم ایس دھونی کی قیادت میں بھارتی ٹیم نے 200 میچز کھیلے، 110 میں کامیابی حاصل کی اور 74 میں شکست کا منہ دیکھنا پڑاجبکہ 5 ٹائی ہوئے اور 11 بے نتیجہ رہے۔ دھونی آسٹریلیا کے رکی پونٹنگ اور نیوزی لینڈ کے اسٹیفن فلیمنگ کے بعد 200 میچوں میں قومی ٹیم کی قیادت کرنے والے دنیا کے تیسرے کپتان ہیں۔

دھونی کے بعد سابق ٹیسٹ کرکٹر اظہر الدین دوسرے نمبر پر ہیں انہوں نے 174میچوں میں بھارتی ٹیم کی قیادت کی تھی۔