حسن روحانی کا فون، عمران خان نے دورہ ایران کی دعوت قبول کرلی

ایرانی صدر حسن روحانی نے چیئرمین پاکستان تحریک انصاف کو فون کرکے ایران کے دورے کی دعوت دی، عمران خان نے ایرانی صدر کی دعوت قبول کرلی۔

ایران کے صدر حسن روحانی نے وزارت عظمیٰ کے عہدے کیلئے نامزد عمران خان کو ٹیلی فون کرکے انتخابات میں کامیابی پر مبارکباد دی اور پاک ایران تعلقات و باہمی دلچسپی کے امور پر تبادلہ خیال کیا۔

حسن روحانی کا کہنا تھا کہ پاکستان اور ایران صرف ہمسائے نہیں مذہبی اور ثقافتی بندھن سے جڑے ہیں، جبکہ پاک ایران تعلقات میں مزید پختگی اور اضافے کے خواہاں ہیں۔

حسن روحانی نے چیئرمین پی ٹی آئی کو دورہ ایران کی دعوت دی گئی، عمران خان نے ایران کے دورے کی دعوت قبول کرتے ہوئے کہا کہ انتقالِ اقتدار کا عمل مکمل ہوتے ہی دونوں ممالک کی وزارتِ خارجہ دورے کو حتمی شکل دے گی۔

متوقع پاکستانی وزیراعظم عمران خان کا کہنا تھا کہ پاکستان ایران سے خصوصی تجارتی تعلقات قائم کرنا چاہتا ہے اور ایران کے ساتھ سفارتی تعلقات میں مزید پختگی کا بھی خواہشمند ہے۔