پاک ترک مشترکہ بحری مشقیں اختتام پذیر

کراچی : پاک ترک بحری افواج کی شمالی بحیرۂ عرب میں منعقدہ پہلی مشترکہ بحری مشق ترگت ریز (شمشیر اسلام) اختتام پذیر ہوگئیں۔

پاک بحریہ کے اعلامیہ کے مطابق ترک بحریہ کے فریگیٹ ٹی سی جی گیلیبولو، پاکستان نیوی بحری جہازوں سیف، اصلت، نصر، قوت، عظمت اور زرار کے علاوہ پاکستان نیول ایوی ایشن کے فکسڈ اور روٹری ونگ ایئر کرافٹ نے مشقوں میں حصہ لیا، پاک فضائیہ کے لڑاکا طیارے بھی اس مشق میں شریک تھے۔

اعلامیے میں بتایا گیا ہے کہ مشق کا بنیادی مقصد دونوں ممالک کی بحری افواج کے مابین مشترکہ آپریشنز کی صلاحیت کو فروغ دینا تھا، بحری مشق ترگت ریز 2018ء کے دوران بحری آپریشنز کی ایک وسیع رینج کی ریہرسل کی گئی جس میں اینٹی سرفیس، اینٹی ایئر اور اینٹی سب میرین وار فیئر کے علاوہ مختلف بحری جنگی چالوں اور رابطے کی مشقیں شامل تھیں۔

مشق کے دوران بحری قذاقی کی روک تھام کی ڈرلز بھی کی گئیں جن میں بورڈنگ ٹیموں نے مشکوک بحری جہاز پر بورڈنگ آپریشنز کا عملی مظاہرہ پیش کیا، مشقوں سے دونوں ملکوں کے بحری افواج کے افسروں اور جوانوں کو ایک دوسرے کے تجربات سے فائدہ اٹھانے اور پیشہ ورانہ صلاحیتوں میں اضافے کا موقع ملا۔

جمہوریہ ترک کے قونصل جنرل تولگا اکاک نے بھی کھلے سمندر میں ٹی سی جی گیلیبولو اور پی این ایس اسلط سے اس مشق کا معائنہ کیا۔ انہوں نے مشق میں شریک پاکستان اور ترک افواج کے افسروں و جوانوں کو مشترکہ بحری مشق کے کامیاب انعقاد پر مبارک باد پیش کی اور امید ظاہر کی کہ مستقبل میں دونوں افواج کے درمیان یہ مشق ایک مستقل شکل اختیار کرلے گی۔