افغان انتخابات،نئے صدر کے چناؤ کیلئے کل ووٹ ڈالےجائیں گے

اسٹاف رپورٹ
کابل : افغانستان میں نئے صدر کے انتخاب کے لئے کل ووٹنگ ہوگی، انتخابی معرکہ ميں آٹھ امیدوار میدان میں ہیں ليکن اصل مقابلہ عبداللہ عبداللہ،زلمے رسول اور اشرف غنی میں متوقع ہے۔

افغانستان کا نیا صدر کون ہوگا، نئے صدر کے چناؤ کیلئے فیصلہ کل ہوگا، پانچ سال تک اقتدار کی کرسی پر براجمان ہونے کے لئے آٹھ امیدواروں میں مقابلہ ہے، جن میں سے تین کے درمیان سخت مقابلے کی توقع ہے۔

سابق وزیر خارجہ اور جمعیت اسلامی کے امیدوار ڈاکٹرعبداللہ عبداللہ تاجک اکثریتی علاقوں میں مقبول وہ شمالی اتحاد کے سربراہ احمد شاہ مسعود کے مشیر بھی رہ چکے ہیں۔ سابق وزیر خارجہ زلمے رسول بھی صدارتی دوڑ میں نمایاں ہیں، وہ صدر حامد کرزئی کے بااعتماد ساتھی تصور کیے جاتے ہیں۔

پشتون رہنما اشرف غنی بھی صداتی انتخاب میں مضبوط امیدوار وہ وزیر خزانہ سمیت کئی اہم عہدوں پر فائز رہ چکے ہیں۔ دیگر امیدواروں میں گل آغا شیرزئی، محمد داؤد سلطان زئی، عبدالرسول سیاف، قطب الدین ہلال، ہدایت اللہ امین ارسلا شامل ہیں۔ صدر حامد کرزئی نے عوام سے انتخابات میں بھرپور حصہ لینے کی اپیل کی ہے۔

افغانستان میں ایک کروڑ دس لاکھ افراد ووٹ ڈالنے کے اہل ہیں، جن کے لئے اٹھائیس ہزار پانچ سو پولنگ اسٹیشن بنائے گئے ہیں۔ سماء