قومی اقتصادی کونسل کا اجلاس آج ہو رہا ہے

اسلام آباد : وزیراعظم شاہد خاقان عباسی کی زیر صدارت قومی اقتصادی کونسل کا اجلاس آج ہو رہا ہے۔ اجلاس میں وزرائے اعلی سمیت کونسل کے رکن، وفاقی اور صوبائی وزراء شریک ہوں گے۔

تفصیلات کے مطابق وزیراعظم شاہد خاقان عباسی نے قومی اقتصادی کونسل کا اہم اجلاس آج طلب کرلیا، جب کہ اجلاس میں صوبائی وزرائے اعلی سمیت کونسل کے رکن، وفاقی اور صوبائی وزراء شریک ہوں گے۔

ذرائع کا کہنا ہے صدر ممنون حسین نے سندھ کے صوبائی وزیر منظور وسان کو قومی اقتصادی کونسل کا رکن مقرر کرنے کی منظوری دے دی ہے۔ ذرائع کے مطابق منظور وسان کو سابق صوبائی وزیر میر ہزار خان بجارانی کی جگہ قومی اقتصادی کونسل کا رکن مقرر کیا گیا اور کابینہ ڈویژن نے منظور وسان کی رکنیت کا نوٹیفکیشن جاری کردیا ہے۔

ذرائع نے مزید بتایا کہ قومی اقتصادی کونسل 3نکاتی ایجنڈے پر غور کرے گی، جب کہ آزاد کشمیر ,فاٹا کے لئے ترقیاتی منصوبوں کی منظوری کی حد میں اضافے کی سمری منظوری کے لئے پیش کی جائے گی۔

اجلاس میں رواں مالی سال کے وفاقی ترقیاتی بجٹ کا جائزہ بھی لیا جائے گا، 5 سالہ سماجی و اقتصادی مقاصد کے حصول کا منصوبہ بھی ایجنڈے میں شامل ہےجبکہ بارہواں5 سالہ منصوبہ 2018 تا 2023 پرمشتمل ہوگا۔ سماء