شریفوں کی موجودگی میں ملک میں جمہوریت نہیں آئیگی، طاہر القادری

لاہور : علامہ ڈاکٹر طاہر القادری شریف خاندان پر برس پڑے، بولے کہ یہ رہے تو اس ملک میں جمہوریت نہیں آئے گی، پولیس نے جاتی امراء کو تحفظ دیا، قوم کی بچیوں کو تحفظ کیوں نہیں دیا، ایک بھائی کو عدلیہ نے نااہل کیا دوسرے  بھائی نے 14 بے گناہوں پر فائرنگ کرائی، قوم اٹھے اور پہچانے کہ دشمن کون ہے، ہم ملک کو ان درندوں سے بچانے کیلئے اکٹھے ہوئے ہیں، میرا مقصد اپنی ذات کیلئے عہدہ، منصب حاصل کرنا تھا، نہ ہے اور نہ ہوگا۔

لاہور میں پاکستان عوامی تحریک اور اپوزیشن جماعتوں کے بڑے احتجاجی جلسے خطاب کرتے ہوئے پی اے ٹی سربراہ ڈاکٹر علامہ طاہر القادری شریف خاندان اور مسلم لیگ ن کو شدید تنقید کا نشانہ بنایا۔ بولے کہ ملک کی ساری قومی سیاسی مذہبی قیادت تکریم انسانیت کیلئے جمع ہے، یہ کمال سانحہ ماڈل ٹاؤن کے شہداء کی قربانیوں، ان معصوم بچوں بچیوں کا ہے جنہیں تحفظ فراہم نہیں کیا گیا، پولیس نے جاتی امراء کو تحفظ دیا، قوم کی بچیوں کو تحفظ کیوں نہیں دیا، پولیس شریف خاندان کو تحفظ دینے میں لگی ہے اور سارا پنجاب غیرمحفوظ کردیا گیا۔

انہوں نے علامہ اقبال کا شعر معمولی سی ترمیم کے ساتھ پڑھا، بولے کہ اٹھو میری دنیا کے غریبوں کو جگادو، جاتی امراء کے در و دیوار ہلادو، سلطانی مظلوم کا آتا ہے زمانہ جو نقش ستم تم کو نظر آئے مٹادو۔

پی اے ٹی سربراہ کہتے ہیں کہ شریف خاندان اقتدار میں رہا تو اس ملک میں جمہوریت نہیں آئے گی، انہوں نے ہر جگہ اپنے بندے بھرتی کر رکھے ہیں، گزشتہ 10 سال میں ساڑھے 700 ارب روپے پنجاب پولیس کو دیئے گئے، سپاہی سے لے کر آئی جی تک تقرر و تبادلہ ان کے ہاتھ میں ہے، یہ واحد جماعت ہے جس کا نام کسی شخص کے نام پر ہو، کیا پاکستان سلطنت شریفیہ کے لٹیروں کیلئے بنا تھا؟، ایک بھائی کو عدلیہ نے نااہل کیا دوسرے بھائی نے 14 بے گناہوں پر فائرنگ کرائی، ہم چاہتے ہیں قانون عوام اور نواز شریف کے بچوں سمیت سب کیلئے برابر ہو، ہم ملک کو ان درندوں سے بچانے کیلئے اکٹھے ہوئے ہیں۔

طاہر القادری نے مزید کہا کہ ہماری تحریک تمام مظلوموں کو انصاف دلانے کی تحریک ہے، سلطنت شریفیہ کے جرائم کیخلاف آج جمع ہیں، ہم نے قانون ہاتھ میں لینا ہوتا تو سانحات برداشت نہ کرتے، ہمارا شیوہ نہ توڑ پھوڑ ہے نہ جلاؤ گھیراؤ، ہم آپ کے ظلم و جبر کو توڑنا چاہتے ہیں، دنیا کو مشرق سے بعید تک امن کا فلسفہ سمجھایا، نواز، شہباز شریف اگر امن توڑنا ہوتا تو آپ کو جاتی امراء سے باہر ایک قدم رکھنے کی جراٴت نہ ہوتی، ہم ملک کے امن کو نہیں توڑنا چاہتے۔

پی اے ٹی سربراہ بولے کہ قوم اٹھے اور پہچانے کہ دشمن کون ہے، ہم ملک کو ان درندوں سے بچانے کیلئے اکٹھے ہوئے ہیں، عدلیہ کو آزاد رکھنے اور ہر مظلوم کو انصاف دلانے کیلئے اکٹھے ہوں، انسانی حقوق کچلے جارہے ہیں، قومی دولت لوٹی جارہی ہے، میرا مقصد سوئے ہوئے شعور کو جگانا، بے آوازوں کو آواز دینا ہے، میرا مقصد کوئی عہدہ، منصب حاصل کرنا تھا، نہ ہے اور نہ ہوگا۔

طاہر القادری نے احتجاجی جلسے سے خطاب کرتے ہوئے مزید کہا کہ سب کو بلانے کا مقصد اپنی ذات کیلئے کچھ حاصل کرنا نہیں، آج ہم سب سانحہ ماڈل ٹاؤن کے متاثرین کو انصاف دلانے جمع ہوئے ہیں، معاشرے میں اتنی تقسیم، تفریق ہوچکی کہ کسی معاملے پر مل بیٹھنے کا حوصلہ نہیں رہا۔ سماء